چترال بمبوریت روڈ خستہ حالی کا شکار، سیاح اور مقامی افراد مشکلات

چترال سے کالاش ویلی بمبوریت جانے والی مرکزی سڑک کی حالت انتہائی خراب ہو چکی ہے، جس کے باعث نہ صرف مقامی آبادی کو روزمرہ سفر میں مشکلات کا سامنا ہے بلکہ سیاحت بھی بری طرح متاثر ہو رہی ہے۔ جگہ جگہ گڑھے، مٹی کے تودے، اور ناقص نکاسی کا نظام سفر کو خطرناک بنا دیتا ہے۔ سیاحوں کی شکایات کے مطابق 12 کلومیٹر کا سفر کئی گھنٹوں میں طے ہوتا ہے، اور بارشوں کے موسم میں یہ سڑک مکمل طور پر بند ہو جاتی ہے۔ کالاش تہذیب دیکھنے آنے والے مقامی و غیر ملکی سیاح اکثر راستے سے ہی واپس جانے پر مجبور ہو جاتے ہیں۔ مقامی عمائدین اور نمائندوں نے حکومت سے مطالبہ کیا ہے کہ بمبوریت روڈ کی فوری مرمت اور پختہ کاری کی جائے تاکہ سیاحت کو فروغ ملے اور کالاش کمیونٹی کو بنیادی سہولت میسر ہو۔ اگر بروقت توجہ نہ دی گئی تو یہ سڑک کسی بڑے حادثے کا باعث بن سکتی ہے۔